बारा समाचारमुख्य समाचार

यसरी भयो बारामा ५ जनाको भूमिगत टयाङ्कीमा मृत्यु

कलैया । बारामा घरेलु मदिरा उत्पादन गर्न बनाइएको भूमिगत टयाङ्कीमा निसासिएर पाँच जनाको मृत्यु भएको छ ।

फेटा गाँउपालिका ४ स्थित बतरा गाँउमा रहेको जोगा मुखिया बिनको घरभित्र बनाइएको भूमिगत ट्याङकीभित्र मुखियासहित पाँचजनाको मृत्यु भएको हो । मृत्यु हुनेमा एकै परिवारका ४ जना छन् ।

मृत्यु हुनेहरुमा ४० वर्षीय जोगा मुखिया बिन, ३७ वर्षीय उनकी श्रीमति लालमुनि देवी, छोरी १० वर्षीया सुमनी कुमारी, जोगाका भाइ ३५ वर्षीय महेन्द्र मुखिया बिन र मदिरा भट्टीमा काम गर्ने भारतको बहुकठवाका ५५ वर्षीय गुलाबचन्द मुसहर रहेका जानकारी प्राप्त भएको छ ।

घरेलु रक्सी उत्पादनका लागि घरभित्रै बनाइएको भूमिगत टयाङ्कीमा बुधबार बेलुकी साढे ७ बजेतिर गुलाब चन्द पसेका थिए । टयाङ्कीभित्र पसेका गुलाब चन्द, बाहिर ननिस्किएपछि उनलाई हेर्न टयाङ्कीभित्र पालै पालो पसेका घरमुली जोगासहित अरु चार जनाको पनि मृत्यु भएको बुझिएको छ । जोगा मुखियाको घरमा लामै समयदेखि अवैध रुपमा घरेलु मदिरा उत्पादन हुँदै आएको थियो गाउंलेले बताएका छन् ।

गत भदौ २३ गते प्रहरीले उनको घरमा छापा मारेर छतमा बनाइएको रक्सी उत्पादन गर्ने भट्टी र भाँडाकुडा नष्ट गरेको थियो । त्यसपछि मुखियाले घरभित्र नै सिमेन्टको भूमिगत टयाङ्की बनाएर फेरि घरेलु रक्सी उत्पादन गर्दै आएका थिए।

पक्की घरभित्र चारैतिरबाट पर्खाल लगाएर जमिन मुनि बनाइएको झण्डै ५ फिट गहिरो भूमिगत टयाङ्कीभित्र मदिरा बनाउनका लागि कुहाइएको वस्तुबाट विषाक्त ग्यास बन्न गइ अक्सिजनको कमीका कारणले निसास्सिएर उनीहरुको मृत्यु भएको प्रहरीको प्रारम्भिक अनुमान छ । तर मृत्युको यकिन कारण भने पोष्टमार्टम रिपोर्ट आएपछि मात्र खुल्ने बाराका प्रहरी उपरीक्षक विकासराज खनालले बताए।

बुधबार राति टयाङ्की भित्रबाट शव निकाल्ने क्रममा अक्सिजनको कमी हुन गइ प्रहरीसमेत बेहोश हुने अवस्था आएपछि टयाङ्कीको दुईतिरको पर्खाल भत्काएर शव निकालिएको बुधबार राति घटनास्थलमा पुगेर फर्किएका बाराका प्रहरी प्रवक्ता प्रहरी नायव उपरीक्षक रन्जित सिंह राठौरले बताए ।

प्रहरीले मृत्युको यकिन कारण खुल्न नसकेको बताए पनि स्थानीयले भने घरेलु मदिरा उत्पादनका लागि बनाइएको भूमिगत टयाङ्कीभित्र पसेका बेला करेन्ट लागेर पाँचै जनाको मृत्यु भएको हुनसक्ने आशंका गरेका छन ।

बिहीबार घटनास्थलमा पुगेका स्वास्थ्यकर्मी अली अकबर हुसेनले पनि टयाङ्कीको अवस्था हेर्दा अक्सिजनकै कमी भइ निसास्सिएर ५ जनाको एकैपटक मृत्यु हुने अवस्था नदेखिएको बताए ।

Back to top button
Close